Nýggju gøtuljós inn í Líðini í Vági tendraði

Vágs kommuna: So eru nýggju gøtuljósini av Tríkantinum á Sandinum og inn í Líðina, heilt inn til býarskeltið innanfyri omankoyringina til Oyrarnar, tendraði.

Gomlu gøtuljósini eru skift við nýggj LED-ljós, og verða gomlu træ-lyktapelarnir nú tiknir niður.

Verkætlanin, sum Landsverk varir av, er gjørd sum liður í ferðslutrygdarætlanini, sum verður framd í samstarvi millum Vágs kommunu, Landsverk og Løgregluna.

Við nýggju LED-gøtuljósunum er farleiðin inn í Líðina vorðin munandi betri upplýst og hevur hetta eisini stóra ávirkan á ferðslutrygdina í økinum. Komandi ár verða eisini gjørd onnur átøk fyri at bøta um ferðslutrygdina inni í Líðini.

Leggjast kann afturat, at ferðslutrygdarætlanin sjálvsagt fevnir um alla kommununa og eru eisini ætlanir um fleiri átøk í 2018, og eru peningur eisini settir av til endamáli á fíggjarætlanini hjá Vágs kommunu.

Tað eru MR-EL og E-Grevstur, sum hava staðið fyri arbeiðinum fyri Landsverk.

Upptøkurnar niðanfyri gjørdi Niels Jacob Eysturberg.