Onkustaðni her á leiðini, kanska nakað vestari á, fara okur at koyra undir havsins botni um eini 8-10 ár. Tað verður eitt øgiligt framstig – leyst av ferðaætlan, siglingstíð, seinkingum og avlýsingum.
Seinastu tvey árini hava føroysku miðlarnir – ikki minst KVF – gjørt eitt týðandi arbeiðið við at varpa ljós á so nógvar tættir sum til ber í sambandi við Suðuroyartunnilin. Tað er gott. Og eitt av heilt góðu íkastunum var Breddin í morgun.
MEN nógvar av søgunum snúgva seg um at tosa við stovnar og fólk, sum av ymiskum orsøkum eru ímóti ella seta stór spurnartekin við at Suðuroyartunnilin verður gjørdur – ella at hann verður gjørdur beint nú.
Spurningurin er, nær fara miðlarnir at tosa við tey, sum fáa fyrimunir og nýggjar møguleikar við føstum sambandi um Suðuroyarfjørð?
- Við vinnufyritøkur, sum í dag skipað sítt virksemi í mun til ferðaætlanina hjá Smyrli – sum skulu hava vørur og tænastur suður við Smyrli – ella sum av og á ikki fáa sínar vørur við Smyrli orsaka av plássmangli.
- Við fólk í Suðuroynni, sum ferðast til arbeiðis í Havn og hvønn dag brúka 5-6 tímar í ferðatíð til og frá arbeiði.
- Ella við ítróttarfólk, sum viku um viku ferðast norðureftir til hondbólt, fótbólt, flogbólt, svimjing, kappróður, borðtennis, judo og so framvegis.
- Ella við ungdómin, sum droymir um eina framtíð í Suðuroynni, men har teirra dreymar um útbúgving kanska forða teimum í at flyta aftur til Suðuroynna.
- Ella við kommunurnar í Suðuroynni, sum stríðasta við fólkatalsminking og av somu orsøk minking í skattainntøkum – og teimum avbjóðingum, sum tað hevur við sær.
Kom nú KVF og hini – tað er eisini ein onnur síða av søguni um Suðuroyartunnilin, sum eigur at verða søgd.
Dennis Holm
Facebook viðmerkingar