Hevur tú eitt uppskot um, hvør skal heiðrast á ÍtróttaFAGNAÐINUM 2025? So er at gera skjótt av og senda Ítróttasambandi Føroya títt uppskot
Mánakvøldið 1. desember er síðsta freist at senda uppskot til ÍtróttaFAGNAÐIN 2025. Hetta er ein áminning til allar føroyingar, ið vilja fagna ella takka einum fólki ella felagsskapi fyri teirra arbeiði og týdning fyri føroyskan ítrótt.
Tað er ein, sum fer avstað við heiðurslønini, men royndir frá undanfarnum árum vísa okkum, at tað ger stóran mun hjá teimum, sum eru innstillað. Tað er ein viðurkenning, sum hevur stóran týdning og eggjar teimum til at halda fram við somu orku og eldhuga.
Og tú kanst gera mun hjá einum, ið ger mun! Tað gert tú við at innstilla ein felagsskap, ein venjara, eina eldsál, eina sólstrálu ella eitt fólk, sum ígjøgnum áratíggju hevur tænt ítróttinum.
Ítróttasamband Føroya skipar á hvørjum ári fyri ÍtróttaFAGNAÐINUM, sum varpar ljós á føroysk ítróttafólk, hjálparfólk, leiðarar, venjarar, eldsálir o.o., sum á ymsan hátt virka í føroyska ítróttaheiminum.
Á ÍtróttaFAGNAÐINUM eru seks heiðurslønir og eitt heiðursbræv:
ÍtróttaNAVNIÐ, ÍtróttaSTJØRNUSKOTIÐ, ÍtróttaFELAGSSKAPURIN, ÍtróttaVENJARIN, ÍtróttaELDSÁLIN, ÍtróttaSÓLSTRÁLAN og Heiðursskjal Poul E. Petersen.
Øll kunna innstilla Ársins ÍtróttaELDSÁL, Ársins ÍtróttaSÓLSTRÁLU, Ársins ÍtróttaFELAGSSKAP, Ársins ÍtróttaVENJARA og Heiðursskjal Poul E. Petersen, meðan bara sambondini og starvsnevndin í ÍSF innstilla Ársins ÍtróttaNAVN og Ársins ÍtróttaSTJØRNUSKOT.
Vitja isf.fo, har finnur tú leiðreglur og leiðbeining til, hvussu tú innstillar.
ÍtróttaFAGNAÐURIN 2025 er í Varpinum í Klaksvík leygarkvøldið 7. februar 2026.
Facebook viðmerkingar