Verkmeistarin á elverkunum í Suðuroy seinastu mongu árini, fer frá vegna aldur, og tí leita vit eftir einum nýggjum verkmeistara at byrja 1. apríl ella eftir avtalu.
Elverkini í Suðuroy
Vágsverkið er enn bulurin í elveitingini í Suðuroy og tryggjar streymveitingina, tá ið varandi orkukeldur ikki einsamallar strekkja til. Tilsamans nýggju fryntlig og dugnalig fólk starvast á Vágsverkinum, og samlaði framleiðslumátturin er 13 MW. Á verkinum eru fýra dieselmotorar og tilhoyrandi hjálpimaskinarí. Verkið hevur nútímans stýri- og eftirlitsskipan, og avlopshiti frá kølivatni verður latin Pálshøll. Umframt Vágsverkið eru vatnorkuverk í Botni og sólorkuverk í Sumba. Eisini samstarva elverkini í Suðuroy við leiðsluna av vindorkufelagnum í Neshaga og Porkeri um eftirlit av vindmyllunum í Porkeri og hava avtalu við netpartin hjá Sev um viðlíkahald av synkronkompensatorinum í Porkeri.
Starvið
Verkmeistarin hevur leiðsluábyrgd, og vit vænta, at tú gongur á odda og hevur ein savnandi leiklut við denti á starvsfólkatrivnað.
Starvið fevnir um at skipa dagliga raksturin, og at mynda menningina av Vágsverkinum, vatnorkuverkinum í Botni og sólorkuverkinum í Sumba. Harumfamt at hava eftirlitið við vindmyllunum í Porkeri og at skipa viðlíkahaldið av synkronkompensatorinum í Porkeri.
Sum verkmeistari hevur tú yvirskipaðu ábyrgdina av framleiðslu, viðlíkahaldi og rakstrarútgerð soleiðis, at elframleiðslan er støðug og trygg. Tú hevur eisini fíggjarligu og strategisku ábyrgdina og hevur ein virknan leiklut í arbeiðinum við framhaldandi útbyggingum og grøna orkuskiftinum.
Tú
Vit vænta, at tú:
- hevur viðkomandi leiðsluroyndir ella hevur evni sum leiðari
- dugir væl við fólki
- hevur ein mennandi, savnandi og kveikjandi leiðsluhátt
- hevur útbúgving sum maskinmeistari og royndir innan orkuframleiðslu ella líknandi
- dugir at skipa arbeiðið og leggja ætlanir
- dugir væl at samstarva og samskifta við starvsfelagar, veitarar og viðskiftafólk
- hevur góðar tekniskar førleikar og breiða vitan um framleiðsluútgerð
- hevur royndir við fíggjarstýring
- dugir at samskifta á føroyskum, norðurlendskum og enskum máli
- torir at taka avgerðir
Neyðugt er við koyrikorti.
Sev
Á Sev eru vit av teirri áskoðan, at starvsfólkahópurin hevur tað best, tá ið arbeiðsumstøðurnar eru smidligar, møguleiki er fyri ávirkan á egið arbeiði og fakligari menning. Tí lurta vit eisini eftir tínum ynskjum og tørvi, í tann mun tað ber til.
Setanar- og lønarviðurskifti
Starvsstaðurin er Vágsverkið, og tú vísir til deildarstjóran fyri framleiðslu.
Setanarviðurskiftini eru sambært sáttmála millum Kommunala Arbeiðsgevarafelagið og Maskinmeistarafelagið, og starvið er lønt í lønarflokki 35.1 eftir lønartalvuni hjá Felag Tænastumanna Landsins, tó uttan at vera tænastumannastarv.
Umsóknin
Hevur hetta tín áhuga fáast fleiri upplýsingar um starvið frá Hera Mortensen, deildarstjóra fyri framleiðslu, á telefon 218419. Umsóknarfreistin er 6. februar 2026. Send okkum umsókn, prógv og onnur viðkomandi skjøl á starv@sev.fo, viðmerk: Verkmeistari Vágsverkið.
Sev tryggjar føroyska samfelagnum støðugan streym alt samdøgrið. Starvsfólk hjá Sev virka undir virðisorðunum: samstarv, eldhugi og virðing. Ágrýtni starvsfólkahópurin ber hvønn dag Sev framá í týðandi leiklutinum sum samfelagsins lívæðr. Vit stremba áhaldandi eftir at fáa sum mest av elframleiðsluni burtur úr varandi orkukeldum. Sev er fólksins ogn – allar kommunurnar í Føroyum eiga Sev, ið varð stovnað 1. oktober 1946.
Facebook viðmerkingar