Fríggjadagin 8. Oktober byrjar Ljósfestin í Vági, har Vágbingar hátíðarhalda, at tað eru 100 ár síðan Verkið í Botnið var tikið í nýtslu. Ljósfestin er tiltakið har søga, mentan, tónleikur og náttúruupplivingar verða settar á breddan. Ljósfestin verður sett við Minnisvarðan av Anitu Ryggshamar. Ljómur luttekur við sangi og ljósið verður tendra.
Nógv er gjørt burturúr Ljósfestini í Vági, bæði fyri børn og vaksin. Fríggjadagin opnar eitt stórt Leikaland í Marghøllini, sum verður opið til leygardagin 16. Oktober. Vágbingar hava lagt seg eftir, at øll hava okkurt at fara til í heystfrítíðini, her er okkurt fyri øll.
Leygardagin 9. Oktober verður ymiskt fyriskipað saman við SEV, har m.a. gongutúrur verður 100 ár aftur í orkusøguna. Gingið verður frá vindmyllulundini í Porkerishaga til Verkið í Botni, sum hendan dagin eisini er opið alment. Opið hús verður í Botni frá kl. 14.00, og kl. 15.00 verður alment tiltak, har Hákun Djurhuus, stjóri í SEV, og Bjarni Johansen, borgarstjóri í Vági, flyta fram røðu. Poul Andreasen leggur fram bókina “Elektrisitet í 100 ár” á Verkinum, og Ljómur luttekur við sangi.
Í mølini á Marknoyri verður taratúrur við Agnes Mols Mortensen og tónleikur verður seinni um kvøldið á Jugga har Eyðun Nolsøe spælir livandi tónleik.
Fleiri tiltøk verða, eitt nú hevur SEV ein fyrilestur í Miðlatúni onskvøldið har Tróndur Enni og Lív Næs spæla livandi tónleik, føroyskur dansur verður í Jómsborg fríggjakvøldið, og Hjá Jugga hevur eisni opið, har Uni Debes spælir.
Leygardagin 16. Oktober verður listaframsýning við lokalum listafólkum í Suðuroyar Sparikassa, handlarnir hava opið til kl 16, Ruth Smith savnið og Sluppsavnið hava opið.
Í miðbýnum verður telt sett upp, har verður livandi tónleikur, og Niels Petur Nolsøe fer at lesa upp yrkingar.
Kl 18.30 fer Levi R. Mørk, formaður í mentanarnevndini, at heiðra mentafólk.
Ljósfestin endar við eini stórari konsert sum byrjar kl 19.00 í miðbýnum. Luttakandi tónleikarir eru Robert Mc Birnie, Hanus G. Johansen, Georg eystan Á, Ronnie Nielsen, Rúna á Heygum, Eyðun Nolsøe, Ingi og Danny og Hjarnar. Gissur Patursson og Sonne Smith eru frásøgumenn og Gissur diskar.
Skráin sæst á vagur.fo.
Facebook viðmerkingar