Almannaverkið hevur í hálva øld verið ein av súlunum undir føroyska vælferðarsamfelagnum. Ígjøgnum árini hevur stovnurin verið við til at tryggja, at borgarar við ymiskum tørvi fáa stuðul og tænastur, so at tey kunnu liva eitt sjálvstøðugt og virkið lív.
Sum nýggjur landsstýrismaður í almanna- og mentamálum havi eg bert havt høvi at vitja ein lítlan part av teimum tilboðum, sum Almannaverkið veitir, men havi tó longu fingið eina góða fatan av týdningarmikla arbeiðinum, sum verður gjørt – bæði av leiðslu og mongu eldhugaðu starvsfólkunum kring landið.
Í hesum sambandi gleðist eg eisini um, at í dag at hava sett nýggjan stjóra fyri Almannaverkið, sum skal standa á odda fyri alt Almannaverkið, og eg vænti mær gott samstarv í tí komandi arbeiðinum at menna og styrkja tænasturnar enn meira.
Eg gleði meg at vera við til at hátíðarhalda Almannaverkið 2. mai, og at kunna heiðra tað arbeiði, sum er gjørt seinastu 50 árini – og tað sum framvegis liggur fyri framman.
Hjartaliga til lukku við teimum fyrstu 50!
Eirikur í Jákupsstovu
Landsstýrismaður í almanna- og mentamálum
Facebook viðmerkingar