Felagið Føroysk Tónaskøld (FFT – composers.fo) tók í 1992 stig til festivalin Summartónar, sum altso hevur verið kærkomin summargestur á hvørjum ári síðani við konsertum nærum hvønn dag.
Føroyski tónleikurin hevur ment seg nógv, og er eisini meginpartin av innihaldinum á konsertunum 2025, skrivaður av føroyskum tónaskøldum og sangskrivarum.
Vit leggja, sum altíð, dent á at fáa unga ættarliðið við í skránna, og síggja hetta sum ein part av tilgongdini at skapa eitt varandi tónleikaumhvørvi.
Summartónar hava megnað at gjørt ein pall fyri tónleik her heima, og sera hegnisliga knýtt hendan pallin at altjóða tónleikapallinum. Nógv eru tey, ið hava vitjað í Føroyum í smb. við Summartónar, og á hendan hátt fingið innlit í føroyskan tónleik og føroyskt tónleikalív. Harumframt er samstarv í altjóða høpi sprottið úr Summartónum, hetta til gagns fyri nógvar føroyskar tónleikarar og tónaskøld, tí eyðvitað er sera umráðandi at føroyskur tónleikur og føroyskir tónleikarar eisini koma út um landoddarnar.
Summartónar fevna innihaldsliga breitt yvir partiturtónleik, jazztónleik, fólkatónleik, sangskrivarum og crossover- formar, og eru Summartónar høvuðspallurin fyri nýskrivaða tónleikin í Føroyum.
Á festivalinum í 2025 verða uml. 45 frumframførslur av serliga føroyskum verkum og Føroyar verða umboðaðar við ikki færri enn 50 føroyskum tónaskøldum.
Konsertirnar verða í tíðarskeiðinum frá 1. mai til 31. august.
Í viðheftu skrá sæst at konsertir eru kring landið, og at hópin av tónleikarum og komponistum luttaka. Lesið skránna her.
At gjøgnumføra tiltakið samstarvar FFT við stovnum, konserthús, kommunum og feløgum so sum Fólkatónleikarafelagið og Havnar Jazzfelag. Uttan samstarv hevði Summartónar ikki kunnað hildið á so leingi – 34. ferð er í ár.
Summartónar 2025 hevur heitt á Urd Johannesen at skriva eitt ”Vælkomin á Summartónum”:
Summarið í Føroyum er serstakt. Bjarta ljósið birtir sinnið. Úr haganum titra tónar av fuglasangi. Úr moldini spretta summardáir. Um kvøldarnar hoyrist látur frá spælandi børnum millum húsaveggirnar.
Vit flyta okkum úr gerandisdegnum og út í landsløg og bygdaleiðir at strimbra sansirnar og skriva nýggjar setningar í minnisbókina.
Summarið í Føroyum hevur tónar. Summartónar.
Summartónar eru tónlistarligu lokkanetini, sum flyta okkum út í stórfingnar skálar og trongar trækirkjur. Frísk lot uttaneftir og heimlig ljóð í durum bera vit við okkum inn um vetrargátt, tá summartónar aftur fjara. Summartónar í Føroyum eru serstakir. Og vælkomnir.
Urd Johannesen, Mentanarsamskipari í Runavíkar Kommunu
Vælkomin á Summartónar 2025
Kristian Blak og nevndin í FFT: Sunleif Rasmussen, Guðrið Hansdóttir, Heðin Ziska Davidsen
Vitjið heimasíðuna Summartónar.fo.
Facebook viðmerkingar