Í hesum døgum er sluppin Johanna TG 326 á forkunnugari ferð, sum byrjaði mánadagin, tá Johanna í góðveðrinum fór av Vági. Av Vági gekk ferðin til Inverness á eystursíðuni í Skotlandi, har farið verður inn í Kaledonsku kanalina, sum gongur tvørtur gjøgnum Skotlandi.
Johanna hevur gjørt fleiri túrar gjøgnum Kaledonsku kanalina. Seinast varð farið gjøgnum kanalina vestanífrá, har farið verður norðanfyri Fort William. Nú gongur leiðin so eystanífrá vestur gjøgnum kanalina og við á ferðini eru 17 mans.
Í góðveðrinum í morgun fór Johanna inn í fyrstu slúsuna við Inverness. Kaledonska kanalin hevur tilsamans 29 slúsur, sum hjálpa skipum at flyta seg millum ymisk vatnstøði á leiðini tvørtur um Skotland. Tann kendasta slúsuskipanin er Neptune’s Staircase við Fort William. Hon er samansett av 8 slúsum í einum samanhangandi stiga og lyftir skip uml. 20 metrar. Hetta er størsta slík slúsuskipan í Stóra Bretlandi.
Myndirnar niðanfyri tók Petur Olaf í Lágabø.
Framhald undir myndini.
Kaledonska kanalín (Caledonian Canal) er ein umleið 97 kilometrar long skipaleið tvørtur um Skotland, sum bindur saman býirnar Inverness í eystri og Fort William í vestri. Kanalin varð bygd í árunum 1803–1822 undir leiðslu av skotska verkfrøðinginum Thomas Telford.
Tilsamans eru umleið 35 kilometrar av sjálvari kanalini manngjørdir, meðan restin av teimum 97 kilometrunum gongur gjøgnum náttúrlig vøtn, m.a. Loch Ness, Loch Oich og Loch Lochy.
Tað sermerkta við kanalini er, at ein stórur partur av leiðini gongur gjøgnum náttúrlig skotsk vøtn, millum annað Loch Ness, sum er kent fyri søgnina um Loch Ness-skrímslið. Kanalin varð upprunaliga bygd fyri at geva skipum eina tryggari og skjótari leið millum eystur- og vesturstrondina í Skotlandi, uttan at sigla runt um vandamiklu norðurskotsku strendurnar.
Í dag hevur Kaledonska kanalin størri týdning sum ferðamannaattraktión enn sum vinnulig siglingarleið. Hvørt ár vitja túsundtals ferðafólk kanalina, har tey njóta vøkru náttúruna, søguligu slúsurnar og sermerktu skotsku landsløgini. Kanalin verður roknað sum eitt av størstu verkfrøðiligu avrikunum í Skotlandi frá 19. øld.
Facebook viðmerkingar