Fólkatalið var 52.122 tann 1. august

Tann 1. august í ár vóru vit farin upp um 52-túsund fólk í Føroyum. Tá vóru vit 52.122 í tali, sum eru 868 fleiri enn eitt ár frammanundan. Tað kemur av eini nettotilflyting á 575 fólk, sum er munurin millum tilflyting og fráflyting, og einum burðaravlopi á 293, sum er munurin millum fødd og deyð.

Tó er væntandi, at tann stóra fráflytingin, ið vanliga fer fram í august, togar talið nakað niðuraftur. Men tað verður bara tann eina mánaðin, tí eftir tað kemur talið skjótt uppaftur og fara teir næstu mánaðirnar við verandi gongd enn longur upp um 52-túsund. 

Uppgerðin av fólkatølunum er nú trendað, so til ber at lýsa gongdina við at reinsa fyri árstíðarfrávik – so sum ymiska gongdin í juli og august – og aðrar tilvildarligar broytingar frá einum mánað til annan. Tað ger, at vit kunnu samanbera fólkatalið mánaðarliga, hóast mánaðirnir eru ymiskir. Við trendinum kunnu vit til dømis samanbera juli og august, hóast juli er stóri tilflytimánaðurin, og august hinvegin er stóri fráflytimánaðurin.

Les meiri her

Facebook viðmerkingar