Tann 1. desember í fjør var fólkatalið 52.920. Tað er vaksið við 847 fólkum ella 1,6% í mun til somu tíð fyrra árið. Av kommununum var størsti vøksturin í Tórshavnar, Klaksvíkar, Runavíkar, Eystur, Nes, Vágs og Tvøroyrar kommunum. Merkisvert er við lutfalsliga stórum fólkavøkstri í Sandoy og nú eisini í Suðuroy. Hinvegin er vøksturin uppstøðgaður í Vágum.
Verður hugt at fólkavøkstrinum úti um landið (sí talvuna niðanfyri), er hann í tali størstur í Eysturoy og Tórshavnarøkinum. Men lutfalsliga er hann størstur í Sandoyarøkinum við 2,8%, samanborið við 2,0% í Eysturoy og 1,8% í Tórshavnarøkinum.
Tað sum ger stóru broytingina fyri Sandoyarøkið, er serliga ein stór innlendis tilflyting á netto 25 fólk og haraftrat 9 netto úr útlondum.
Í Norðoyggjum er vøksturin 1,4% – og tað er hann eisini í Suðuroy, hóast Norðoyggjar hava eitt burðaravlop á +38 og Suðuroy á -8. Tað sum ger stóra munin, er ein stór nettotilflyting til Suðuroyar á 72 fólk, samanborið við 46 til Norðoyggjar. Serliga stór er tilflytingin til Suðuroyar úr útlondum.
Í Vágum er fólkavøksturin uppstøðgaður, og er tað serliga tí at innlendis flytingin er blivin negativ.
Facebook viðmerkingar