Saman um eitt sjálvsstøðugt land
Ongantíð hevur verið størri tørvur á at standa saman. At standa saman um virðini í fólkaræðinum og fólkarættinum. At standa saman um frælsi og samhaldsfesti. Hetta ger seg galdandi ímillum lond, mótvegis okkum sjálvum altjóða og innanlands í Føroyum.
- Vit fegnast um, at breið semja er í Føroyum um, at ítøkilig stig nú verða tikin, soleiðis at Føroyar gerast eitt sjálvsstøðugt land í viðurkenning av, at ongin uttan føroyingar fyrst hugsa um Føroyar.
- Vit stuðla øllum fólkum, hvørs sjálvsavgerðarrættur verður trýstur.
- Vit standa saman við Evropa um at tryggja frið og fólkaræði.
- Vit stuðla øllum átøkum, sum fremja mannarættindi og forða pínslu og kúgan í hesum heimi, har vit fyri tíðina tíverri mugu kunna okkum av nýggjum hvønn morgun.
Sannroyndin er tíverri, at tingini ofta ganga skeiva vegin uttan um okkum í dag, og tí er tað meira avgerðandi enn nakrantíð, at vit byggja upp á okkara virðir, at: - stuðla upp undir altjóða lóg og felagsskapir.
- raðfesta gransking og menning.
- virða og virka fyri javnstøðu og javnrættindum og arbeiða ímóti mismuni.
- stuðla og hjálpa teimum, sum eru í neyð ella eru hótt.
- stuðla og stimbra skúlaskapi, mentan og felagslívi.
Samhaldsfesti og tað at tryggja, at tað hjá øllum í Føroyum er fjálgt og frítt at anda, er avgerandi. Har stuðla vit arbeiðinum, sum Tjóðveldi saman við hinum samgonguflokkunum, Javnaðarflokkinum og Framsókn hevur framt og vil fremja fyri at byrgja fyri størri ójavna og trýsti á ymisku og fjølbroyttu húsarhaldini í Føroyum. Millum annað kann nevnast, at: - skatturin er lækkaður.
- lønarlyft er latið starvsfólkum á umsorganar-, heilsu-, barnagarðs- og námsfrøðiøkinum.
- løn undir útbúgving á Heilsuskúlanum nú kemur.
- barsilsskipanin er broytt til tað betra.
- hjálparpakkar eru veittir.
- pensjónir og veitingar eru hækkað.
- mál eru um at lækka meirvirðisgjaldið á ávísum gerandisvørum.
- stór komandi átøk innan skúla og bústaðir verða gjørd fyri at tryggja, at okkara ungdómur kann støðast og í minni mun flytur av landinum.
- áhaldandi útbyggingar av neyðugum infrakervi til umsiting, røkt, skúlaskap, heilsu og samferðslu kring allar Føroyar.
Tjóðveldi skal hvønn dag stremba eftir og arbeiða fyri, at flokkurin ikki verður til at koma uttan um í komandi samgongum. Til hetta krevst, at flokkurin veksur, at vit hava eina breidd í flokkinum, og at vit samstarva væl við allar flokkar.
Samtykt á flokstingi Tjóðveldsins í Klaksvík 5. apríl 2025.
Facebook viðmerkingar