SUÐUROY 2036: Okur eru í 2036 og tað er hálvt ár síðani at Suðuroyartunnilin lat upp fyri ferðslu. Suðuroyarportalurin kannar hvørja ávirkan tað hevur havt á fólk, fyritøkur, stovnar, ítróttarlívið, os.fr., at tað nú er koyrandi til og úr Suðuroynni.
Í bilinum í 4-5 tímar, meðan okur bíðaðu eftir Smyrli
Áðrenn tunnilin kom, so var tað púra vanligt, at okur bíðaði longi eftir Smyrli, áðrenn man slapp suðuraftur, greiðir Anna frá, sum eisini fegnast um, at tað nú er koyrandi til meginøkið.
Eg haldi, at øll í Suðuroynni hava onkra søgu um hvussu longi tey hava bíðað, tá tey hava verið norðanfjørðs í arbeiðsørindinum, til læknaviðtalu, til ítrótt og so framvegis.
Okkara børn brúka bæði brillur og hava í eitt tíðarskeið gingið fast til eygnalækna. Ein av seinastu ferðunum, okur vóru til eygnalækna, áðrenn tunnilin lat upp var í vár, tá tey bæði høvdu tíð ein tórsdag.
Tað bar til at fáa tíð hjá eygnalæknanum, soleiðis at okur kundu fara norður við Smyrli kl. 11.30, og tað var jú nógv betri enn at fara kl. 6.00 um morgunin, men okur mistu hóast tað bæði ein heilan arbeiðsdag. Smyril sigldi suður kl. 14.15 tórsdagar, so okur lukkaðust ikki suður fyrr enn um kvøldið.
Okur hava ikki ordiliga nakra familju í Havn og vinfólkini hjá okkum, sum okur vanliga vitja, vóru uttanlands tað vikuna. So eftir at hava tralla SMS upp-og-niður í 1-2 tímar, so endaðu okur við koyra runt í 4-5 tímar, inntil Smyril sigldi kl. 21.15. Og omaná tað heila, so var hann seinkaður hálvan tíma orsaka av nógvum farmi, so tá okur vóru heima í Vági, tá var klokkan farin av midnátt.
Næstu ferð okur fara til eygnalækna, so fara okur frá húsum ein góðan tíma áðrenn viðtaluna og eru heimaaftur í Vági ein tíma eftir viðtaluna. -Okur sleppa undan at leggja heilar arbeiðsdagar niður, sleppa undan at keypa døgurða ella annað á leiðini, tí tað er bara at koyra norður og koyra suður, tað er ein heilt onnur verð, sigur Anna at enda.
Facebook viðmerkingar