IRF sendir glas frá húsarhaldum til endurvinning

Nú fáa fleiri húsarhald møguleika at skilja glas frá til endurvinning. Seinastu árini hava nógv spurt eftir hesum skiljimøguleikanum, og tí er tað gleðiligt, at hetta nú fer at bera til.

Glasið, ið verður skilt frá húsarhaldsburturkastinum, kann latast inn á kommunala endurnýtsluplássið. Enn er hetta ikki ein møguleiki á øllum kommunalum plássum. IRF mælir til, at borgarin spyr seg fyri á sínum lokala plássi.

Ein grønari hugburður

Føroyingar eru sum heild vorðnir alsamt meira umhvørvistilvitaðir, og bæði vinnan og borgarar spyrja eftir fleiri møguleikum at skilja burturkast.

Hugburðurin í føroysku kommununum er eisini nógv broyttur. Tá IRF bjóðaði út møguleika at fáa glasmóttøku á kommunalu plássini, vóru tað fleiri kommunur, sum alt fyri eitt meldaðu seg til nýggju skipanina.

Í vikuni verða glasmóttøkur settar upp hjá Eysturkommunu, Runavíkar kommunu, Vága kommunu, Hvannasund kommunu og Nes kommunu, og væntandi koma fleiri kommunur afturat í næstum.

Hvat glas kann latast til endurvinning?   

Allar glasfløskur, drekkigløs og glaskrukkur kunnu latast til inn endurvinning. Glasluturin skal vera tómur og skolaður við vatni (Tað er ikki er neyðugt at vaska lutin við sápu). Áskriftir (etikettir) kunnu vera á glaslutinum, og tað sama er galdandi fyri lok og proppar úr plasti, korki og metalli.

Hvat glas kann ikki latast til endurvinning?

–          Steintoy og postalín (t.d. koppar og krúss)

–          Keramikkur (t.d. urtapottar)

–          Eldføst føt

–          Grýtulok úr glasi

–          Ljósperur (Allar ljósperur skulu í reyða posan)

–          Spegl

–          Vindeygagløs, bilrútar og laminatgløs

–          Holnálir (kanylir) og annað glas við vandamerki á

Skiljing av húsarhaldsburturkast

Tá tað snýr seg um at skilja húsarhaldsruskið, vísir IRF til bæði hvíta og reyða posan.

Í hvíta posan kanst tú lata:

–          Papp/pappír

–          Tíðarrit og prentað bløð

–          Lýsingar (tak plastposan av fyrst)

–          Smáeskjur (t.d. frá heilivági, smyrsli)

–          Brævbjálvar (við og uttan rút)

–          Skógvaeskjur, papprullur, bøkur

Eisini pappír/papp við eitt nú smáum jarnklipsum, klisturstubbum og tílíkum kann latast í hvíta posan.

Í reyða posan kanst tú lata:

–          Ljósperur

–          Battarí (skulu vera í afturlatnum ílati/krukku fyri seg í posanum)

–          Máling

–          Loysingarevni

–          Sýra og lútur

–          Spreydósir

–          Leivdir av plantu- og djóraeitri

–          Smærri elektroniskir lutir

–          Serliga dálkandi burturkast annars

Tú kanst lesa meira um posarnar á www.irf.fo.

Jarn, metal og bleytt plast

Umframt at skilja í hvíta og reyða posan ber eisini til hjá flestu borgarunum at skilja jarn og metal frá húsarhaldsburturkastinum og lata hetta inn fyri seg í jarnbingjuna á kommunala endurnýtsluplássið.

Harumframt taka flestu kommunalu plássini nú eisini ímóti klárum, bleyti plasti. Talan er um bleytt plast, tá ið tú kanst binda ein knút við tí:

–          Bløðruplast

–          Pakkiplast frá vøruplattum

–          Bleytt pakkiplast til møblar v.m.

–          Plast, sum bløð og lýsingar eru í.

–          Tunnu plastposarnar, tú fært í handlum til frukt

–          Bleyti plastpakkin í legodósum og øðrum spølum/vørum.

–          Plast frá t.d. klædnavørum, tú keypir

*IRF ger vart við, at tað er ymiskt, hvussu nógvar skiljingar eru á teimum kommunalu endurnýtslu- og bingjuplássunum í Føroyum. Vit mæla borgarum til at spyrja seg fyri at tí lokala plássinum.

Facebook viðmerkingar