Løgtingið skal seinnapartin viðgera uppskot frá Ruth Vang, landsstýriskvinnu í Fíggjarmálum, um at veita 41 mió. kr. í eykajáttan til Fámjinstunnilin.
Í viðmerkingunum til uppskotið stendur, at Fámjins kommuna hevur heitt á Fíggjarmálaráðið um at játta 41 mió. kr. afturat til Fámjinstunnilin, soleiðis at eitt luksus-hotel kann gerast inni í stóra hellinum, sum kom eftir omanlopið inni í Fámjinstunlinum.
Fámjins kommuna skrivar, at tey hava verið á rannsóknarferð og hava funnið fram loysn, har eitt luksus-hotel við øllum, sum har hoyrir til, kann gerast inni í fjallinum, við útsýnið út yvir vakra dalin í Fámjin. Bygdaráðið í Fámjin hevur lagt mynd við frá rannsóknarferðini, myndina omanfyri tók Jóanes Lisberg, borgarstjóri í Fámjin.
Ruth Vang, landsstýriskvinna, sigur í stuttari viðmerking, at tað er vorðið so populert at hava hitapottar allastaðni, so hví ikki eisini í einum hotelli í Fámjinstunlinum. Landsstýriskvinna leggur afturat, at Fámjinstunnilin longu er vorðin so dýrur, at um hetta kann skapa øktar møguleikar fyri at fáa fleiri inntøkur, so gevur tað góða meining.
Bygdaráðið í Fámjin sær stórar møguleikar í ferðavinnuni, nú nýggjur tunnil verður gjørdur til bygdina, og hví ikki byrja ferðina við einum hotel-uppihaldi í einum luksus-kamari inni í Fámjinstunlinum, skrivar bygdaráðið í umsóknini til Fíggjarmálaráðið.
Umsókn um eykajáttan kemur til 1. viðgerð í Løgtinginum seinnapartin í dag.
Facebook viðmerkingar