Í vikuni kunngjørdi Strandferðslan broytingar í prísbygnaðinum og dagføring av ferðaseðlaprísum á oyggjaleiðum og bygdaleiðum. Ein av góðu broytingunum er, at tey sum ferðast nógv við oyggjaleiðum, nú fáa eina góða avsláttarskipan.
Sera góð avsláttarskipan fyri pendlarar
Fyri tey, sum t.d. búgva í Nólsoynni og arbeiðir í Havn ella í Kalsoynni og arbeiða í Klaksvík og tí ferðast dagliga til arbeiðis, so er avsláttarskipanin, sum Árskortið gevur, sera góð.
Um tú arbeiðir fulla tíð, so eru tað umleið 20 arbeiðsdagar í hvørjum mánað. Er ein mánaði feria, so verða tað 440 einvegis túrar um árið (40 einvegis túrar um mánaðin til og frá arbeiði).
Hevur tú Árskort, so eru teir seinastu 100 túrarnir ókeypis, tí avslátturin veksur jú oftari tú siglir – og tá tú hevur siglt 336 túrar, so verður tað ókeypis at sigla næstu túrarnir.
Pendlar tú til arbeiðis hvønn dag, so siglir tú við Árskorti ókeypis í umleið 2,5 mánaðir í tí 12 mánaðaskeiðinum Árskortið er galdandi. Við SSL-korti, sum er í dag, fær tú 15% í avsláttri og kostar ein einvegis-ferðaseðil á Nólsoyar- ella Kalsoyarleiðini við SSL-korti í dag “altíð” 17 kr.
Tey, sum pendla úr øðrum oyggjum til arbeiðis, eisini úr Suðuroynni til Havnar, fáa somu ágóðar av stigvíst veksandi avsláttarskipanini. Í dag kostar ein einvegis-ferðaseðil á Suðuroyarleiðini við SSL-korti “altíð” 34 kr. Ferðast tú ofta nóg ofta, so kanst tú eisini enda við at sigla ókeypis á Suðuroyarleiðini.
Eisini góð skipan fyri tey, sum ferðast nógv
Árskortið er eisini ein góð skipan fyri onnur, sum ferðast ofta við oyggjaleiðunum hjá SSL.
Til dømis spælir sonur okkara William hondbólt við U11 hjá VB og fótbólt við FC Suðuroy. Í vetur hava okur verið eini 8-9 ferðir norðanfjørðs við Williami til hondbólt og fara helst eisini at fara eini 8-10 ferðir norðureftir til fótbólt við honum í summar. Tilsamans eini 38-40 einvegis-ferðaseðlar.
Uttan Árskort og nýggju prísunum hevði hvør einvegis-ferðaseðil kosta 50 kr. fyri ein vaksnan. Við Árskortinum fær tú 15% avsláttur, sum er stigveksandi, fyri hvørjar 10 túrar.
Við Árskorti á Suðuroyarleiðini kosta fyrstu 10 ferðaseðlarnir 43 kr., teir næstu 10 kosta 36 kr. Prísurin fyri túrar nr. 21 til 30 er prísurin 31 kr. og teir næstu túrarnir, frá 31-40 kosta 26 kr.
Tað vil siga, at við Árskortinum fær tú 50% í avsláttri um tú ferðast fleiri enn 40 túrar – ella rindar 25 kr. fyri hvønn einvegis-ferðaseðil í staðin fyri 50 kr., um tú ikki hevur Árskort.
So sum heild er nýggja prísskipanin hjá SSL góð fyri tey, sum ferðast nógv á oyggjaleiðunum hjá SSL – og tað var eisini endamálið, tá farið varð undir nýggju prísskipanina.
Dennis Holm
Løgtingslimur fyri Tjóðveldi
Facebook viðmerkingar