Nú ætlar landstýrið aftur at gera seg inn á privata ognarrættin og ræðisrættin hjá fólki at ráða yvir sínum egnu ognum.
Landstýrið at seta treytir fyri, hvat fólk brúka síni egnu hús til. Landstýrið ætlar at innføra bústaðarskyldu.
Hetta merkir, at:
1: Fólk skulu verða skrásett í fólkayvirlitinum at búgva í húsinum.
2: Húsini kunnu í mesta lagi sambært fólkayvirlitinum standa tóm í 6 vikur.
3: Um húsini ikki verða útleigaði innan 6 vikur, skal eigarin boða kommununi frá at húsini ikki ru útleigaði og skal samtykkja at leiga bústaðin út til leigara, sum kommunanávísir.
Um húsaeigarin ikki ynskir at leiga húsini út, so skal hann gjalda dagbøtir á kr. 200,-. Hetta blívur kr. 73.000, – um árið. Hesin peningurin fer í kommunukassan.
Kommunurnar skulu avgera, hvørjar útstykkingar í kommununi skulu hava bústaðarskyldu. Um eigarin ikki heldur krøvini um bústaðarskyldu, so skulu kommurnar fáa heimmild at revsa hann við dagbótum á 200 krónur Hetta verður ein rokning uppá 73.000 krónur árliga.
Hús missa virði
Hesar treytir skulu vera galdandi fyri nýggjar útstykkingar, sum kommunan metir skulu hava bústaðarskyldu. Um hesar treytir verða settar teimum, sum í dag eiga hús/íbúðir, so ber landstýrið ótta fyri endurgjaldskrøvum. Hetta er nokkso sigandi, tí sjálvsagt missa húsini virði, um bústaðarskylda verður galdandi. Tað sigur seg sjálvt, tí eigarin missir fult ræði á ognini.
Peningastovnarnir siga í viðmerking, at virði á ognunum væntandi verður minni, og kravið um eginpening verður størri um bústaðarskylda verður eitt krav.
Missa ræðisrættin á egnum bústaði
Við bústaðarskyldu verður t.d. ikki loyvt at leiga húsini út til airbnb, tí tá krevst, at onkur hevur adressu har. Um húsini standa tóm í meir enn 6 vikur, so skulu tey leigast út til onkran. Um eigarin t.d. hevur hug at fara til Danmarkar ella aðrastaðni í eitt hálvt ella heilt ár í útbúgvingarørindum ella annað, so hevur eigarin skyldu at leiga húsini út.
Soleiðis missir eigarin ræðisrættin á sínum egnu húsum, tí hann verður avskorin frá møguleikanum at koma heim i feriu í styttri ella longri tíð og búgva í sínum egnu húsum. Hetta tí landstýrið krevur, at tey verða útleigaði. Hvør kemur í húsini, og hvussu síggja húsini út, tá eigarin kemur heimaftur? Tað er ilt at vita.
Eigarin kann nokta at leiga húsini út, men so verður hann revsaður við dagbótum á kr 200 krónur um dagin ella kr. 73.000 krónur í eitt ár.
Næsta álopið á húsaeigarar
Hetta er næsta álopið hjá samgonguni á húsaeigarar innanfyri nakrar fáar vikur, tí samgongan ætlar eisini at leggja tænastugjald á hús, har sum eingin er skrásettur at búgva. Hetta kunnu t.d. verða arvaði hús á bygd, sum standa tóm og sum familjan nýtir sum summarhús í sambandi við fjallgongu, seta niður epli o.s.fr. Onkur verður kanska noyddur at selja húsini fyri ein bíligan penga, tí tey hava ikki ráð til fleiri gjøld. Ein arvur blívur ein byrða.
Er tað nakað sum hendan samgongan hevur útmerkað seg við, so er tað at áleggja gjøld, gjøld, gjøld og aftur gjøld. Tey fáa ongantíð nokk.
Hvat verður tað næsta?
Elsebeth Mercedis Gunnleygsdóttir
Tingkvinna fyri Fólkaflokkin
Facebook viðmerkingar