El-bilarnar fara at nærkast einum triðingi av skrásettu føroysku pesónbilunum um fimm ár
El-bilarnir fleirfaldaðir eftir fáum árum
Sølan av el-bilum hevur rættiliga tikið dik á seg hesa seinastu tíðina. Fyri 10 árum síðan vóru bert tríggir av umleið 20.000 persónbilunum í Føroyum el-drivnir. Í 2019 vóru el-bilarnir komnir upp á 99, men síðan tá er talið av el-bilum seksfaldað.
Tá vit komu inn í hetta árið vóru 603 el-drivnir persónbilar skrásettir í Føroyum, og tað er framvegis stórur vøkstur í eftirspurninginum og søluni av el-bilum.
Heldur henda gongdin fram, so fara vit at nærkast 10.000 el-bilum um fimm ár, sum fer at svara til næstan ein triðing av samlaða talinum av skrásettum persónbilum í Føroyum.
Tøknilig menning og størri útboð sett fer á søluna av el-bilum
Fremstu orsøkirnar til stóra vøksturin í skrásettum el-bilum eru tøkniliga menningin og skjótt vaksandi útboði av el-bilum hesi seinastu árini. Í 2018 var vanligt við 20 kWt battaríum, men í dag eru flestu battaríini omanfyri 60 kWt. Tað merkir, at flestu el-bilarnir nú koyra millum 300 og 400 kilometrar upp á eina løðing, ella ein tanga, sum vit vildu sagt um bensin og diesel bilarnar.
Fyri fáum árum síðan var sjáldsamt at síggja el-bilar í úrvalinum hjá stóru og kendu bilverksmiðjunum, men hetta er eisini fullkomiliga broytt. Seinastu árini eru alsamt fleiri el-bilar komnir í úrvali, og tað leggjast alla tíðina fleiri el-bilar afturat úrvalinum av nýggjum bilum á marknaðinum.
Stórur tørvur verður á fleiri el-løðistøðum komandi tíðina
Skjótt vaksandi talið av el-bilum fer at seta stór krøv til útbygging av infrakervinum við løðistøðum til el-bilar, kring alt landið, hesa komandi tíðina.
Facebook viðmerkingar