Dialysusjúklingar gíslar í lønartrætu

Nýrasjúklingarnir mugu í miðdepilin, tað eru teir ikki sum nú er. 

Tað er skelkandi at frætta, at dialysusjúklingar í Suðuroy framvegis mugu ferðast til Landssjúkrahúsið til dialysu, meðan dialysan á Suðuroyar sjúkrahúsi stendur óvirkin, vegna eina ósemju um lønarískoyti. 

Nýrafelagið leggur seg ikki útí løn hjá dialysu starvsfólkunum, men vit krevja, at ein loysn veður funnin beinanveg, so dialysan í Suðuroy kann takast í brúk sum skjótast. 

Nýrafelagið og einstaklingar hava í fleiri ár arbeitt við at betra korini hjá dialysusjúklingum, sum skulu ferðast langa leið til dialysu, og nú dialysan í Suðuroy er tøk, er tað bæði synd og skomm, at sjúklingarnir eru gíslar í onkrari lønartrætu ella vánaligari ráðlegging. 

Nýrafelagið heitir á viðkomandi myndugleikar at gera skjótt av og loysa trupulleikan til frama fyri dialysusjúklingarnar. 

Nýrafelagið