Nógvur tónleikur á skránni á Ljósfest

Nú nærkast til Ljósfest 2025, sum verður í døgunum 15. til 17. august.

Skráin er rúgvusmikil, og sera nógvur tónleikur er á skránni.

Fríggjakvøldið spæla Karl Martin Samuelsen og Mikkjal Hvannastein í tjaldinum, og teimum á baki koma Jákubina Ellingsgaard við bólki og síðani Ragnar í Vík.

Seinni á kvøldi spæla Gerhard og Áki á Jugga.

Leygardagin er sýning av filminum um tónleikaran Róin Siggertsson í Miðlatúni, og prát verður eisini við Róin, ið har eisini syngur nøkur løg.

Klokkan 15 er barnaundirhald á pallinum, har Bubu undirheldur, og Oddi vitjar við ballónum.

Klokkan 19 byrjar heilt stóra tónleikabrakið á pallinum, har Gissur Patursson er plátuvendari og Bjørn Hentze Bech er frásøgumaður og pallstjóri.

Hesi fara á pall:

Lív og Tróndur við bólki, Signar í Homrum við bólki, Janus Wiberg Mortensen við bólki, Section, Marius Ziska, Hvarv og síðani enda Danny & the Weetos kvøldið.

Øll skráin sæst her.